शिक्षकांच्या वेतन व भविष्य निर्वाह निधीच्या प्रश्नांवर मंगेश चिवटेंची सोलापूर येथे भेट
शिक्षकांच्या प्रलंबित प्रश्नांचा आढावा घेत अधिकाऱ्यांशी साधला संवाद
सोलापूर | प्रतिनिधी :
पुणे विभाग शिक्षक मतदारसंघातून निवडणूक लढविण्यास इच्छुक असलेले आरोग्यदूत मंगेश चिवटे यांनी आज वेतन व भविष्य निर्वाह निधी पथक, माध्यमिक व उच्च माध्यमिक, सोलापूर येथे भेट देत शिक्षकांच्या विविध प्रलंबित प्रश्नांबाबत संबंधित अधिकारी व कर्मचाऱ्यांशी संवाद साधला.
यावेळी शिक्षकांच्या वेतनासंदर्भातील अडचणी, भविष्य निर्वाह निधीशी संबंधित प्रकरणे, प्रलंबित सेवाविषयक बाबी तसेच शिक्षकांना भेडसावणाऱ्या विविध प्रशासकीय अडचणींचा आढावा घेण्यात आला.
शिक्षकांना वेळेत वेतन मिळावे, भविष्य निर्वाह निधीशी संबंधित प्रकरणांचा तातडीने निपटारा व्हावा आणि सेवाविषयक प्रलंबित प्रश्नांवर प्रशासनाने सकारात्मक भूमिका घ्यावी, अशी भूमिका मंगेश चिवटे यांनी यावेळी मांडली.
यासोबतच जुनी पेन्शन योजना लागू करणे, प्रचलित नियमानुसार टप्पा वाढ देणे तसेच त्रुटी पूर्तता झालेल्या शिक्षकांच्या प्रलंबित मागण्या मार्गी लावणे, या प्रमुख प्रश्नांसाठी शासनस्तरावर सातत्याने पाठपुरावा सुरू असल्याचे चिवटे यांनी सांगितले.
शिक्षकांच्या प्रश्नांकडे केवळ निवडणुकीच्या काळात नव्हे, तर सातत्याने लक्ष देऊन शिक्षक, मुख्याध्यापक, संस्थाचालक व शिक्षकेतर कर्मचाऱ्यांच्या अडचणी शासनाच्या निदर्शनास आणून देऊन त्यावर तोडगा काढण्यासाठी प्रयत्नशील राहणार, अशी ग्वाही मंगेश चिवटे यांनी दिली.
पुणे विभाग शिक्षक मतदारसंघातील पाचही जिल्ह्यांमध्ये शिक्षकांशी प्रत्यक्ष संवाद साधून त्यांच्या समस्या जाणून घेण्याचा उपक्रम सुरू असून, त्यातून समोर येणाऱ्या प्रश्नांचा अहवाल शासनस्तरावर सादर करून त्यासाठी प्रभावी पाठपुरावा करण्याचा निर्धार त्यांनी व्यक्त केला.
जुनी पेन्शन योजना, टप्पा वाढ, त्रुटी पूर्तता, वेतन आणि भविष्य निर्वाह निधी यांसारखे शिक्षकांच्या दैनंदिन सेवेशी निगडित प्रश्न मार्गी लागणे हीच आपली प्राथमिकता असल्याचे मंगेश चिवटे यांनी यावेळी स्पष्ट केले.