शिक्षकांच्या प्रलंबित प्रश्नांवर मंगेश चिवटेंचा जनता दरबार; अनेक कामांना मिळाली गती
शिक्षणाधिकारी सचिनजी जगताप यांच्या उपस्थितीत शिक्षकांच्या समस्या जाणून घेत तातडीने कार्यवाही
सोलापूर | प्रतिनिधी :
पुणे विभागीय शिक्षक मतदारसंघातून निवडणूक लढविण्यास इच्छुक असलेले आरोग्यदूत मंगेश चिवटे यांच्या पुढाकाराने आज सोलापूर येथे शिक्षकांच्या विविध प्रलंबित प्रश्नांसाठी जनता दरबाराचे आयोजन करण्यात आले. सोलापूरचे शिक्षणाधिकारी सचिनजी जगताप साहेब यांच्या उपस्थितीत झालेल्या या जनता दरबारात शिक्षकांनी मांडलेल्या विविध समस्या व प्रलंबित कामांवर संबंधित विभागाच्या अधिकाऱ्यांशी चर्चा करून अनेक कामांना तातडीने गती देण्यात आली.
या जनता दरबारामध्ये शिक्षकांनी वेतन, सेवाविषयक बाबी, भविष्य निर्वाह निधी, मान्यता, प्रलंबित प्रस्ताव, टप्पा वाढ, त्रुटी पूर्तता तसेच इतर प्रशासकीय प्रश्न मांडले. प्रत्येक प्रकरणाची माहिती जाणून घेत संबंधित अधिकाऱ्यांशी चर्चा करण्यात आली आणि शक्य असलेल्या प्रकरणांमध्ये जागेवरच कार्यवाही करून प्रलंबित कामे मार्गी लावण्यात आली.
शिक्षकांना आपल्या समस्या घेऊन वारंवार कार्यालयीन फेऱ्या माराव्या लागू नयेत, त्यांच्या प्रश्नांची प्रशासनाकडून गांभीर्याने दखल घेतली जावी आणि पात्र प्रकरणांचा वेळेत निपटारा व्हावा, या उद्देशाने जनता दरबाराचे आयोजन करण्यात आले होते.
यावेळी मंगेश चिवटे यांनी शिक्षकांच्या प्रश्नांबाबत आपली भूमिका स्पष्ट करताना सांगितले की, “शिक्षक हा समाज घडविणारा महत्त्वाचा घटक आहे. त्यांच्या हक्काच्या कामांसाठी त्यांना कार्यालयांचे उंबरठे झिजवावे लागू नयेत. शिक्षकांच्या प्रत्येक रास्त आणि प्रलंबित प्रश्नासाठी शासनस्तरावर सातत्याने पाठपुरावा करणे ही माझी भूमिका आहे.”
शिक्षकांच्या प्रमुख मागण्यांमध्ये जुनी पेन्शन योजना लागू करणे, प्रचलित नियमानुसार टप्पा वाढ देणे, त्रुटी पूर्तता झालेल्या शिक्षकांचे प्रलंबित प्रश्न सोडविणे, वेतन व भविष्य निर्वाह निधीशी संबंधित अडचणी दूर करणे या मागण्यांचा समावेश असून, या सर्व प्रश्नांसाठी शासनाकडे सातत्याने पाठपुरावा सुरू असल्याचेही चिवटे यांनी सांगितले.
पुणे विभागीय शिक्षक मतदारसंघातील शिक्षकांशी थेट संवाद साधून त्यांच्या अडचणी समजून घेणे आणि त्या अडचणींचे प्रत्यक्ष निराकरण करण्यासाठी प्रशासन व शासनस्तरावर पाठपुरावा करणे, या उद्देशाने मंगेश चिवटे यांचा शिक्षक संपर्क दौरा सुरू आहे.
आजच्या जनता दरबारातून शिक्षकांनी मांडलेल्या प्रश्नांवर प्रशासनाने सकारात्मक प्रतिसाद देत अनेक प्रलंबित कामांना गती दिल्याने उपस्थित शिक्षकांनी समाधान व्यक्त केले.
“शिक्षकांचे प्रश्न फक्त ऐकायचे नाहीत, तर ते प्रत्यक्ष मार्गी लावण्यासाठी प्रयत्न करायचे,” या भूमिकेतून मंगेश चिवटे यांच्या पुढाकाराने आयोजित करण्यात आलेल्या या जनता दरबाराला शिक्षकांचा सकारात्मक प्रतिसाद मिळाला.