दहा वर्षांची प्रतीक्षा संपली; मंगेश चिवटेंच्या पाठपुराव्याने माने कुटुंबाला न्याय!
जनता दरबारात मांडलेला अनुकंपा नियुक्तीचा प्रश्न तातडीने मार्गी; “चिवटे साहेब, तुमचे उपकार आयुष्यभर विसरणार नाही” – माने कुटुंबाची भावनिक प्रतिक्रिया
सोलापूर | प्रतिनिधी :
गेली तब्बल दहा वर्षे प्रलंबित असलेल्या अनुकंपा नियुक्तीच्या प्रस्तावाला अखेर न्याय मिळाला. सोलापूर येथे आयोजित करण्यात आलेल्या जनता दरबारात माने कुटुंबाने आपली व्यथा आरोग्यदूत मंगेश चिवटे यांच्यासमोर मांडली. या प्रकरणाची गांभीर्याने दखल घेत चिवटे यांनी तातडीने शिक्षणाधिकारी सचिनजी जगताप यांच्याशी चर्चा करून आवश्यक कार्यवाही करण्याच्या सूचना दिल्या. त्यानंतर माने कुटुंबाच्या प्रलंबित अनुकंपा नियुक्तीच्या प्रश्नाला गती मिळाली.
दहा वर्षांपासून शासकीय कार्यालयांच्या पायऱ्या झिजवूनही मार्ग निघत नसलेल्या या कुटुंबाला जनता दरबाराच्या माध्यमातून मोठा दिलासा मिळाला. वर्षानुवर्षे प्रलंबित असलेला प्रस्ताव केवळ ऐकून न घेता त्यावर तातडीने पाठपुरावा करून मार्गी लावण्याची भूमिका मंगेश चिवटे यांनी घेतली.
यावेळी भावनिक झालेल्या माने कुटुंबीयांनी मंगेश चिवटे यांचे आभार मानताना, “आमच्या कुटुंबाच्या दहा वर्षांच्या प्रतीक्षेला आज न्याय मिळाला. आमची व्यथा समजून घेऊन तातडीने पाठपुरावा केल्याबद्दल चिवटे साहेब, तुमचे हे उपकार आम्ही आयुष्यभर विसरणार नाही,” अशा शब्दांत कृतज्ञता व्यक्त केली.
यावर मंगेश चिवटे यांनी सांगितले की, “जनता दरबाराचा उद्देश केवळ नागरिकांच्या समस्या ऐकणे नसून त्या समस्या प्रत्यक्षात मार्गी लावणे हा आहे. एखाद्या कुटुंबाला दहा-दहा वर्षे न्यायासाठी प्रतीक्षा करावी लागणे ही अत्यंत वेदनादायक बाब आहे. शिक्षक व शिक्षकेतर कर्मचाऱ्यांच्या सेवाविषयक प्रश्नांसाठी आपण सातत्याने पाठपुरावा करत राहू.”
माने कुटुंबाच्या प्रकरणातून जनता दरबाराचा प्रत्यक्ष फायदा आणि तातडीच्या पाठपुराव्याचे महत्त्व अधोरेखित झाले आहे. शिक्षकांच्या वेतन, भविष्य निर्वाह निधी, अनुकंपा नियुक्ती, जुनी पेन्शन योजना, टप्पा वाढ तसेच त्रुटी पूर्तता झालेल्या प्रलंबित प्रश्नांसाठी मंगेश चिवटे यांचा पाठपुरावा सुरूच राहणार असल्याचे यावेळी सांगण्यात आले.