जुनी पेन्शन योजना लागू करण्यासाठी कोल्हापुरात शिक्षकांचा महामोर्चा; मंगेश चिवटे यांचा पाठिंबा
कोल्हापूर:
राज्यभरात गाजत असलेल्या जुन्या पेन्शन योजनेच्या (OPS) पुनरुज्जीवनासाठी आज कोल्हापूर शहरात शिक्षक आक्रमक पवित्रा घेतला. प्रलंबित मागण्यांकडे शासनाचे लक्ष वेधण्यासाठी शिक्षक बांधवांच्या वतीने जिल्हाधिकारी कार्यालयावर एका भव्य आणि शिस्तबद्ध ‘मूक मोर्चा’चे आयोजन करण्यात आले होते. हजारो शिक्षकांच्या उपस्थितीमुळे जिल्हाधिकारी कार्यालय परिसर दणाणून गेला होता.
सकाळी शहरातील मध्यवर्ती ठिकाणाहून या मोर्चाला सुरुवात झाली. कोणतीही घोषणाबाजी न करता, हातावर काळ्या फिती बांधून आणि हातात विविध मागण्यांचे फलक घेऊन हजारो शिक्षक या मोर्च्यात सहभागी झाले होते. अतिशय शांततेत आणि शिस्तीत निघालेला हा मूक मोर्चा जिल्हाधिकारी कार्यालयावर धडकल्यानंतर त्याचे सभेत रूपांतर झाले. जुनी पेन्शन योजना ही शिक्षकांच्या भविष्याची आणि सुरक्षेची मुख्य ढाल असून ती पूर्ववत लागू झालीच पाहिजे, असा एकमुखी सूर या वेळी उपस्थितांमधून उमटला.
या मोर्चाला पुणे विभाग शिक्षक मतदारसंघाचे उमेदवार मंगेश चिवटे यांनी विशेष उपस्थिती लावून शिक्षकांच्या आंदोलनाला जाहीर पाठिंबा दर्शवला. उपस्थितांशी संवाद साधताना चिवटे म्हणाले, “शिक्षकांचे हे आंदोलन केवळ हक्कासाठी नसून त्यांच्या भविष्यातील सुरक्षिततेसाठी आहे. मी पूर्णपणे शिक्षक बांधवांच्या पाठीशी खंबीरपणे उभा आहे. शिक्षकांच्या या रास्त मागण्या केवळ कागदावर न राहता, प्रशासकीय आणि शासकीय स्तरावर ठोसपणे पोहोचवून त्या मंजूर करून घेण्यासाठी मी प्रामाणिक पाठपुरावा करेन.