प्राथमिक शिक्षकांच्या प्रश्नांसाठी मंगेश चिवटेंची धाव; शिक्षणाधिकारी विशाल मुळे यांच्या कार्यालयात प्रलंबित प्रश्न मार्गी
सोलापूर येथील प्राथमिक शिक्षण विभागाला भेट; शिक्षकांच्या सेवाविषयक प्रश्नांवर तातडीने कार्यवाही
सोलापूर | प्रतिनिधी :
पुणे विभागीय शिक्षक मतदारसंघातून निवडणूक लढविण्यास इच्छुक असलेले आरोग्यदूत मंगेश चिवटे यांनी आज सोलापूर येथील प्राथमिक शिक्षणाधिकारी विशाल मुळे यांच्या कार्यालयाला भेट देऊन प्राथमिक शिक्षकांच्या विविध प्रलंबित प्रश्नांबाबत चर्चा केली.
यावेळी प्राथमिक शिक्षकांच्या वेतन, सेवाविषयक बाबी, प्रलंबित प्रस्ताव, मान्यता, अनुकंपा नियुक्ती तसेच इतर प्रशासकीय प्रश्नांचा आढावा घेण्यात आला. संबंधित शिक्षकांच्या अडचणी समजून घेत प्रलंबित कामे मार्गी लावण्यासाठी तातडीने आवश्यक कार्यवाही करण्यात आली.
शिक्षकांना आपल्या हक्काच्या कामासाठी वारंवार शासकीय कार्यालयांचे उंबरठे झिजवावे लागू नयेत, यासाठी प्रत्येक प्रश्नाचा सातत्याने पाठपुरावा करून तो मार्गी लावण्याची भूमिका मंगेश चिवटे यांनी यावेळी व्यक्त केली.
“शिक्षकांचे प्रश्न हे केवळ कागदावरील विषय नाहीत, तर त्यामागे शिक्षकांचे कुटुंब, त्यांचे भविष्य आणि त्यांच्या सेवेचा सन्मान जोडलेला आहे. त्यामुळे कोणताही प्रश्न प्रलंबित राहू नये, यासाठी संबंधित अधिकाऱ्यांशी समन्वय साधून सातत्याने पाठपुरावा करत राहणार,” असे मंगेश चिवटे यांनी सांगितले.
सोलापूर दौऱ्यात शिक्षकांच्या विविध विभागांना भेटी देऊन प्रत्यक्ष संवाद साधत वेतन, भविष्य निर्वाह निधी, जुनी पेन्शन योजना, टप्पा वाढ, त्रुटी पूर्तता आणि प्रलंबित सेवाविषयक प्रश्न मार्गी लावण्यासाठी मंगेश चिवटे यांनी पुढाकार घेतला आहे.